Croeso Cynnes i bawb

Diolch am ystyried Ysgol Awel y Mynydd fel ysgol i'ch plant.

Mae’n bleser gennym rannu gyda chi ychydig o’r hyn y gallwn ei gynnig i’n disgyblion. Hefyd i’ch sicrhau, ar ôl dewis Ysgol Awel y Mynydd i’ch plentyn, y byddwn yn gwneud ein gorau glas i sicrhau eu bod yn cael y dechrau gorau oll mewn bywyd ac yn edrych yn ôl ar eu haddysg gynnar gyda hoffter, hapusrwydd a balchder!
Ein blaenoriaeth yw darparu amgylchedd gofalgar, hapus a diogel i'ch plentyn, gydag ystod eang o brofiadau dysgu sy'n eu galluogi i dyfu'n ddinasyddion annibynnol, cyfrifol yr 21ain Ganrif. Dim ond gyda phartneriaeth agos rhieni y gallwn gyflawni hyn ac anelwn weithio gyda chi er mwyn gwneud hynny.

​

Dewis Ffrwd Iaith

Rydym yn unigryw yn y Sir ac o bosib yng Ngogledd Cymru gan ein bod yn gallu cynnig dewis iaith i unrhyw deulu ar gyfer dysgu yn Awel y Mynydd. Un ysgol yw ein hysgol ni ond mae gennym ni ddwy ffrwd iaith.

Mae ein ffrwd Gymraeg yn cynnig dwyieithrwydd go iawn. Dwy iaith, dwywaith y dewis, dwywaith y cyfle. Bydd y plant sy’n mynychu’r ffrwd Gymraeg yn cael eu haddysgu yn Gymraeg yr holl ffordd drwy’r ysgol ac mae bron pob plentyn wedyn yn mynychu ein Hysgol Uwchradd Gymraeg - Ysgol y Creuddyn. Bydd y plant yn gadael gyda'r gallu i siarad, ysgrifennu, gwrando a dysgu yn y Gymraeg a'r Saesneg. Bydd y plant, os ydynt yn parhau i ysgol uwchradd Gymraeg, yn gallu byw a gweithio yng Nghymru a manteisio’n llawn ar unrhyw gyfle a ddewisant.

Mae ein ffrwd Dysgwyr Cymraeg hefyd yn cynnig dwyieithrwydd lle dysgir y Gymraeg fel ail iaith. Dysgir y mwyafrif helaeth o’u pynciau i’r plant trwy gyfrwng y Saesneg a byddant yn dysgu ac yn cael eu trochi mewn Cymraeg bob dydd a chael gwersi Cymraeg i ddatblygu a gloywi eu sgiliau dwyieithog. Mae bron pob un o’n plant yn y ffrwd Dysgwyr yn symud i Ysgol Uwchradd Aberconwy.

Nid oes angen gwneud eich dewis iaith ar unwaith ac nid yw’r iaith rydych yn ei siarad gartref yn effeithio ar eich dewis. Pan ddaw’n amser dewis wrth i’r plant ddod i blwyddyn Derbyn, rydym yma i gefnogi a thrafod eich dewisiadau gyda chi a’r plant. Rydym yma i sicrhau bod y plant yn cyrraedd eu llawn botensial, beth bynnag fo’ch dewis. Byddwn bob amser yn gwrando arnoch, yn eich cefnogi ac yn rhannu ein hysgol gyda chi.

​

Mae anghenion eich plentyn yn ganolog i’n nodau, ein cynllunio, datblygiad, y gymuned a byddwn yn gweithio’n galed i sicrhau’r gorau iddyn nhw i gyd!
Diolch yn garedig am gymryd yr amser i edrych ar Ysgol Awel y Mynydd. Cofiwch gysylltu â ni os hoffech drafod eich opsiynau neu ofyn unrhyw gwestiynau.

Edrychwn ymlaen at eich gweld yn Ysgol Awel y Mynydd

Diolch yn fawr iawn

Mr Geraint Evans
Pennaeth